Sunday, August 11, 2019

நேர்கொண்ட பார்வை :


Share/Bookmark
இது ஒரு Biased Review. ஏன் அப்டி சொல்றேன்னா நம்ம எப்ப அஜித் விஜய் படங்களுக்கு ரிவியூ பன்னாலும் அது baised ah இருக்கதா நண்பர்களே பல பேர் சொல்லிருக்காங்க. நம்ம எப்பவும் போலதான் பன்றோம். அது அவங்களுக்கு பயாஸ்டா தெரியிது. அதனால ஏன் அவங்கள  மேல பல்ல போட்டு பேச வைக்கனும்னு தான் நானே biased review ன்னு போட்டுட்டேன். சரி வாங்க படம் எப்டி இருக்குன்னு பாப்போம்.

பெரும்பாலும் பெரிய ஹீரோ படங்களுக்கு இந்த Press show க்கள் போட மாட்டாங்க. ஆனா வழக்கத்துக்கு மாறா இந்த படத்துக்கு press show லாம் போட்டு நல்லா கவனிச்சிருப்பாங்க போல. புகழ்றதுக்கு என்னெனல்லாம் வார்த்தை இருக்கோ அத்தனையும் உபயோகிச்சி இந்தப் படத்த புகழ்ந்து தள்ளிருக்காங்க.  Press show நல்லா வேலை செஞ்சிருக்கு.

இன்றைய சூழலுக்கு தேவையான ஒரு படம்..இந்த சப்ஜெக்ட்ட எடுத்து நடிச்சதுக்கு அஜித் சார பாராட்டனும்..  h. வினோத்தோட வசனங்களெல்லாம் கத்தி மாதிரி இருக்குது. இது ரீமேக் படம்றதயே மறந்து அடிச்சி தூள் கிளப்பிட்டு இருக்காங்க. சரி அது அவங்க தொழில். சரி நம்ம பார்வைல படம் எப்டி இருக்குன்னு பாப்போம். 

1994 ல ப்ரியங்கான்னு ஒரு படம். ஜெயராம் ரேவதி நடிச்சது. ரேவதி வீட வேலைபாக்குற ஒரு பொண்ண ஒரு கும்பல் ரேப் பன்னிடுவாங்க. அதுக்கு ஐ விட்னஸ் ரேவதி. அந்த கேஸ் ஒழுங்கா நடக்கக்கூடாதுன்னு ரேவதிக்கு பல பக்கங்கள்ளருந்தும் presssure. அப்ப தண்ணியடிச்சிட்டு சுத்துற ஒரு வக்கீல் ப்ரபுகிட்ட  அந்த கேஸ் போகும். அவரு வாதாடி எப்டி கேஸ ஜெயிக்கிறார்ன்றதுதான் கதை. ப்ரபுக்கும் படத்துல ஒரு ஃபைட்டுலாம் இருக்கு..

கிட்டத்தட்ட அதே மாதிரியான கதை மற்றும் ஹீரோவின் கதாப்பாத்திர அமைப்போட வந்துருக்க படம் தான் இந்த நேர்கொண்ட பார்வை. அங்க ப்ரபு குடிகாரரா இருப்பாரு. இங்க அஜித் வந்து கலகலப்பு திமிங்கலம் சுகர் மாத்திரை வச்சிருக்க மாதிரி இவரு டிப்ரஷனால மாத்திரை போட்டுட்டு இருப்பாரு. மாத்திரை போடலன்னா வெறி வந்து பல பேர அடிச்சி தொம்சம் பன்னிருவாரு.  அப்படிப்பட்ட கேரக்டர்.

பசங்க கூட டின்னருக்கு போற மூணு பொண்ணூங்ககிட்ட அவனுங்க சில்மிஷம் பன்னிட்டானுங்கன்னு ஒரு பாட்டில எடுத்து மூஞ்ச பேத்துருது ஒரு பொண்ணு. அதனால ஏற்படுற விளைவுகள்தான் படம். முதல் பாதிய ரொம்ப கஷ்டப்பட்டுதான் கடக்க வேண்டியிருக்கு. பெரிய அளவுல எந்த காட்சியுமே மனசுல ஒட்ட மாட்டுது. 


இந்த பேய் படங்கள்ள பாத்தோம்நா பில்ட் அப்ப ஏத்துறதுக்காக ஒவ்வொரு சீன் முடியிறப்பவும் அந்த வீட்டு  வேலைக்காரனயோ இல்ல தோட்டக்காரனஜ்யோ காட்டுவானுக.. அவன் அப்டியே மொறைச்சிக்கிட்டே இருப்பான். அதாவது அவருதான் பேயின்னு நம்ம கவனத்த திருப்புறானுகளாம். இந்தப் படத்துல அஜித்தும் அந்த மாதிரிதான் வர்றாரு முதல் பாதில. அப்பப்ப அஞ்சலி பாப்பா மாதிரி ஒண்ணு ரெண்டு வார்த்தை பேசுவாறு.  இண்டர்வல்ல அஜித் ரசிகர்கள குஷி படுத்துறதுக்காக  ஒரு ஃபைட்ட சொருவி விட்டுருக்காங்க. 


செகண்ட் ஆஃப்ல கோர்ட் சீன் வந்தபுறம் ஓரளவுக்கு படம் க்ரிப்பா போகுது. கோர்ட் சீன் ரொம்ப லெந்த்து.. அவ்வளவு இழுக்குற அளவுக்கு கண்டெண்டே இல்ல. ஒரு மர்டர் மிஸ்ட்ரி சஸ்பெக்ட் யாருன்னு விசாரணை பன்றாங்கன்னா ஓக்கே.. சுவார்ஸ்யமா இருக்கும். இங்க சுத்தி சுத்தி ரெசாட்டு ரூமுக்குள்ள போனேன் கதவ சாத்துனேன்.. சரக்கு அடிச்சேன் இவ்வளவுதான். சட்டுபுட்டுன்னு முடிச்சி விடுங்கன்னு தான் தோணுச்சி. ரங்கராஜ் பாண்டே அவர் இண்டர்வியூல கேள்வி கேக்குறதே கோர்ட்ல வாதாடுற மாதிரி தான் இருக்கும். அப்டியே படத்துலயும் பேச வச்சிருக்கலாம். ஆனா அவரோட ஸ்லாங்க மாத்தி கொஞ்சம் நக்கலடிக்கிற மாதிரி பேழுறது கொஞ்சம் irritating ah இருக்கு. 


H.vinoth.. நம்ம பசங்க அடிக்கடி யாரு பேரயாச்சும் போட்டு most under rated இயக்குனர்னு போடுவானுங்கல்ல.. அந்த மாதிரி இவர் most overrated இயக்குனரோன்னு தோணுது. இவருக்கும் Al.vijay க்கும் பெரிய வித்யாசம் தெரியல. ஏன்னா Al.விஜய் என்ன பன்னுவாப்ளன்னா சீன் எடுப்பாரு. அந்த சீன்ல நமக்கு எந்த ஒரு எமோஷனும் வராது. அதே மாதிரி தான் இவரும். காட்சிகள சும்மா எடுக்குறாரு. ஆனா சுவாரஸ்யமா எடுக்க மாட்றாரு. உதாரணத்துக்கு வித்யாபலன் சாகுற சீன் எடுத்துருப்பாரு. புளியே இல்லாம புளி சோறு செஞ்சா எப்டி சப்புன்னு இருக்குமோ அந்த மாதிரி எந்த எமோஷனும் இல்லாம கடனுக்குன்னு இருக்கும். தீரன்லயுமே அதான் ப்ரச்சனை. காட்சிகள் நகரும். ஆனா அதுல பெரிய அளவுல சுவாரஸ்யம் இருக்காது.

அதே மாதிரி கதாப்பாத்திர அமைப்புல ஒவ்வொரு கேரக்டரோட தன்மையும் அந்த கதை ஓட்டத்துக்கு எதாவது ஒரு வகையில சப்போர்ட் பன்னனும். இங்க அஜித்த ஏன் இவ்வளவு சோகமா காமிக்கிறாங்கன்னு தெரியல.. அவரு ஃப்ளாஷ்பேக்னால என்ன யூஸ்? அஜித் அந்த மாதிரி despressed ah இருக்கதால கதையில என்ன ப்ரயோஜனம்? May be pink la அமிதாப் அப்டி இருக்கதால இவங்க வச்சிருக்கலாம். ஆனா அஜித்துக்கு அப்டி காட்டனும்னு அவசியம் இல்லை. அவரோட ரோல ஜாலியா பன்னிருந்தா இன்னும் அந்த கோர்ட் சீன்ஸ் நல்லா எடுபட்டுருக்கும். Message um இன்னும் நல்லா ரீச் ஆயிருக்கும் . அஜித் எதோ டாஸ்மாக்குல ரெண்டு ரவுண்டு எக்ஸ்ட்ராவாகி மட்டையான   தாத்தா மாதிரி உக்கார்ந்துருப்பாப்ள. படத்துக்கு பேருதான் நேர் கொண்ட பார்வை. ஆனா தல படம் ஃபுல்லா கேமராவ பாத்து பேசாமா சைடா பாத்துதான் பேசிகிட்டு இருப்பாரு.  இதுல அடிகடி இ.ஆ.பா விபின் சொல்லுவாப இதயம் பலபீனமானவங்க சொல்றாப்ள ரூல் புக் பாயிண்ட் நம்பர் -1 , பாயிண்ட் நம்பர் 2 ன்னு ... தல உசுற வாங்காம உக்காரு தலன்னு இருந்துச்சி.

சோசியல் மெசேஜ்.. இந்த வரிக்குள்ள நிறைய சுமார் படங்கள் எக்கச்சக்கமா பில்டப் பன்னப்படுது. மெசேஜ் சொன்னா அது நல்ல படம் அவ்வளவு தான். அந்த படத்த நம்மாளுங்க criticise பன்ன மாட்டாங்க. 

அஜித் ஃபேன்ஸ satisfy பன்றது ரொம்ப ஈஸி ஃபோல.. உண்மைலயே அவங்கல பாக்க பரிதாபமா இருக்கு. எத எடுத்தாலும் அவங்களுக்கு அவங்களே satisfy ஆகிக்கிறாங்க. விவேகம் எடுத்தாலும் சரி, விஸ்வாசம் எடுத்தாலும் சரி அவங்க ஹேப்பி. இப்டிலாம் இருந்தா கடைசி வரைக்கும் நல்ல படங்களையே பாக்க முடியாது. இன்னும் ஒரு கார் சீன் ஒரு பைக் சீன வச்சித்தானே எல்லா டைரக்டர்களும் இவங்கள ஏமாத்திட்டு இருக்கானுங்க.   ஒருத்தன் காலைல படம் பாத்துட்டு எங்க தலைக்கு போட்டின்னா அது ஜாக்கிசான் தான்ர்றான். ஜாக்கிசானுக்கு தெரிஞ்சா தூக்குல தொங்கிருவாப்ள. தலை 20 நிமிசம் அதிகமா வந்தாரு கெத்தான்றான்.  இன்னொருத்தன் மைக்கு முன்னாடி நின்னுட்டு வெறி நாய் கவ்வ வர்ற மாதிரி  தல தலன்றான். டேய் இருடா நரம்பு வெடிச்சி செத்துறாதடா..  

இன்னொருத்தர் வந்து இந்தப்படத்துக்கு பாருங்க.. லேடீஸ்லாம் எப்டி கூட்டம் கூட்டமா வந்து ஆதரவு குடுக்கப்போறாங்கன்னு. அதுக்கும் பெரிய வாய்ப்பு இல்ல. ஏன்னா இந்தப் படத்துல காண்பிக்கப்படுற பெண்கள் சராசரி பெண்களுக்கு அப்பாற்பட்டவங்களா இருக்காங்க. அதானால இவங்கள சராசரி வாழ்க்கை வாழும் பெண்கள் அவங்களோட ரிலேட் பன்னி பாத்துக்கவே முடியாது. 

படத்துல நல்ல விஷயங்கள்னு பாத்தா, வீட்ட விட்டு தனியா தங்கி இண்டிபெண்டெண்டா இருக்க பொண்ணுங்க, மத்தவங்ககிட்ட ஜாலியா சிரிச்சி பேசுற பொண்ணுங்கள இந்த சமுதாயம் எந்த மாதிரி பாக்குது, இந்த சமுதாயம் பாக்குற பார்வை தவறு அப்டிங்குறத ரொம்ப தெளிவாவும் அழுத்தமாவும் பதிவு பன்னிருக்காங்க. 

அடுத்து அஜித்... என்ன இருந்தாலும் அவர் இல்லன்னா இந்த படத்துக்கு இவ்வள்வு பெரிய மார்க்கெட்டிங் கிடைச்சிருக்காது. அவரோட ரோல நீட்டா பன்னிருக்காரு. 

அடுத்து இந்தப் படம் தயாரிப்பாளர்களுக்கு மிகப்பெரிய லாபத்தை தரக்கூடிய படமா இருக்கலாம். ஏன்னா மத்த அஜித் படங்கள கம்பேர் பன்னும்போது இதுல பட்ஜெட் ரொம்பவே கம்பியா இருக்கும். ரெண்டாவது பாதி முழுக்கவுமே கிட்டத்தட்ட ரெண்டு மூணு ரூம்லயே முடிஞ்சிருது. 

மொத்தத்துல அத்தனை இணைய தளங்களும் பில்ட் அப் குடுக்குற அளவுக்கு இது ஒரு ஆஹா ஒஹோ படமெல்லாம் இல்ல. ஆனா கண்டிப்பா one time வாட்ச் தான். 

Monday, July 8, 2019

மர்மதேசம் - கருப்பு Is Back!!!


Share/Bookmark
வாரம் ஒரு முறை மட்டும் தோண்றி நேயர்களுடன் பெப்சி உமா பேசிய காலத்தில், ஒரு முறை லைன் கிடைத்து பேசிவிட்டால் நேயர்களின் குரலில் எதோ லாட்டரியில் பத்து லட்சம் விழுந்துவிட்டதைப் போல ஒரு மகிழ்வை காணலாம்.  "லைன் கிடைக்காதவங்க கவலப்படாதீங்க.. கீப் டரையிங்.. அன்ட் கீப் ஆன் ட்ரையிங்.. ச்சேரியா" என்று நிகழ்ச்சியின் முடிவில் பெப்சி உமா சிரித்துக்கொண்டே சொல்லும் போது லைன் கிடைக்காதவர்களுக்கு கூட எதோ ஆறுதல் பரிசு கிடைத்ததைப் போல ஒரு புத்துணர்ச்சி ஏற்படும். வாரம் ஒருமுறை வரும் பெப்சி உமாவிற்காக மக்கள் காத்திருந்த காலம் போய்,  இன்று இருபத்து நான்கு மணி நேரமும் லைவ் நிகழ்ச்சிகளில் எத்தனையோ பெப்சி உமாக்கள் நேயர்களுக்காக காத்திருக்கிறார்கள். பேசுவதற்கு நேயர்கள்தான் இல்லை. காரணம் இன்று இவையெல்லாம் அளவுக்கு மிஞ்சிய அமுதங்கள். 

இதே போல்தான் இன்றைய தமிழ் சீரியல்கள்.. பெரும்பாலும் ஆண்கள் வெறுக்கும் விஷயங்களில் தொலைக்காட்சி சீரியல்களும் ஒண்று.  இந்த சீரியல்களால் மனைவிகளிடமிருந்து நேரத்திற்கு சோறுகிடைப்பதில்லை, சரியான கவனிப்பில்லை போன்ற காரணங்கள் ஒருபுறமிருந்தாலும் முக்கியக் காரணம் என்பது வேறு.

அனைவரும் ஒரு காலத்தில் சீரியல்கள் பார்த்தவர்கள் தான். வாரம் ஒருமுறை அரைமணி நேரம் மட்டும் ஒரு சீரியல் ஒளிபரப்பாகிக் கொணிருந்த பொழுது சீரியல்களின் மேல் இருந்த ஈர்ப்பு இன்று இல்லை.  பெண்கள் வேறு வழியின்றிதான் பார்க்கிறார்களே தவிற இன்றைய சீரியல்களில் பெரிய அளவிலான ஈர்ப்பு எதுவும் இல்லை.

முதல் காரணம் இன்றைய சீரியல்கள் வெறுமனே நேரத்தைக் கடத்தும் வஸ்துவாக மட்டுமே எடுக்கப்படுகிறது. இப்போதைத தமிழ் சீரியல்களில் ஒரு காட்சியில் ஐந்து பேர் இருந்தால், ஒருவர் வசனம் பேசும் போது அந்த வசனத்திற்கான ஐந்து பேரின் ரியாக்‌ஷனும் அத்தனை ஆங்கிள்களிலும் காண்பிக்கப்படுகிறது. இது ஒரு முறை காண்பிக்கப்பட்டால் பரவாயில்லை. கீழிலிருந்து மேலாக, மேலிருந்து கீழாக, இடப்பக்கமிருது வலப்பக்கம், வலப்பக்கமிருந்து இடப்பக்கம் என ஒவ்வொருவர் முகமும் நான்கு ஐந்து முறை   "ஸிக்..  ஸிக்.. " என மியூசிக்குடன் காண்பிக்கப்படுகிறது. விளைவு "ஆ.. அப்டியா" என்கிற வசனத்திற்கு ஐந்து பேரின் ரியாக்‌ஷனை பதிவு செய்து முடிக்கும் பொழுது விளம்பர இடைவேளை வந்துவிடும். 

தொண்ணூறுகள் தமிழ் சீரியல்களின் வசந்த காலம் என்றே கூறலாம். வாரம் ஒருமுறை அரை மணி நேரம் மட்டும் ஒளிபரப்பப்படும். ஒரு நாள் நகைச்சுவை சீரியல், ஒரு நாள் த்ரில்லர், ஒரு நாள் ஆன்மீகம் என ஒவ்வொரு நாளும் ஒவ்வொரு விதமாகச் செல்லும்.

அதில் பெரும்பாலும் புதன்கிழமைகள் சிறப்புமிக்கவை. அதற்கு முக்கியக் காரணம் புதன் கிழமைகளில் ஒளிபரப்பாகும் மர்மதேசம் எனும் மர்மத் தொடர். இன்று எப்படி திங்கட் கிழமை காலை Game of Thrones எப்போது வெளியாகும் என காத்திருக்கும் ஒரு கூட்டம் போல் அப்பொழுது புதன்கிழமைக்காகக் காத்திருந்து சிறியவர்கள் முதல் பெரியவர்கள் வரை 9 மணிக்கு தொலைக்காட்சியின் முன்  ஆஜர் ஆகிவிடுவார்கள்.

அதிலும் குறிப்பாக மர்மதேசத்தின் இரண்டாவது தொடரான  "விடாது கருப்பு" .
கதை, கதை சொல்லும் விதம், காட்சியமைப்பு என அத்தனையிலுமே தமிழில் புதுமையைப் புகுத்திய ஒரு சீரியல்.



கிழிந்து தொங்கும் முகங்கள் கொண்ட பேய்கள் இல்லை. நாம் எதிர்பாராத நேரத்தில் "திடும் திடும்" இசையில் பயமுறுத்திவதில்லை. ஆனாலும் ஒவ்வொரு எபிசோடிலுமே பார்வையார்களுக்கு அந்த "திக் திக்" மனநிலையுடனேயே பார்க்க வைத்தது இந்த சீரியலின் மிகப்பெரிய வெற்றி.

அதே போல கதை சொல்லும் விதம் என்று பார்த்தல் அந்த காலகட்டத்தில் வந்த அனைத்து சீரியல்களுமே  linear ஆன காட்சிகளுடம் செல்லும் போது, முதல் முறையாக 20 நிமிட எபிசோடையே "அன்று" "இன்று" என்று இரண்டு பகுதிகாகப் பிரித்து  இரண்டு வெவ்வேறு டைம் லைனில் கதையை எடுத்துச் சென்றது இந்த விடாது கருப்பு.

கதையிலும் கூட தமிழ் சினிமாவிற்கு 2005 ற்கு பிறகே பரிட்சையமான ஒரு புதுமையை 96 லேயே புகுத்தியிருப்பார்கள். அது என்ன புதுமை? சொல்லக்கூடாது சொல்லக்கூடாது.  அதுதான் கதையில் டர்னிங் பாய்ண்ட்டே. 

ஒருபுறம் தவறு செய்பவர்களைத் இரவில் தண்டிக்கும் கருப்ப சாமி, இன்னொரு புறம் யார் கருப்ப சாமி என்கிற மர்மம், இன்னொரு புறம் புதையலைத் தேடி அலையும் ஒருவர்,  இன்னொரு புறம் மிரட்டும் ஒரு பயங்கரக் கிழவி என எந்த வகையிலும் சுவாரஸ்யத்திற்குப் பஞ்சமில்லாத ஒரு சீரியல் இந்த விடாது கருப்பு.

இன்று ஒரு சீரியலின் ஒரு எபிசோடைத் தவற விட்டால் பெரிதாகப் பதற்றப் படத்தேவையில்லை. அதே சேனலில் பகலில் மறு ஒளிபரப்பு இருக்கும். அல்லது அடுத்த அரை மணி நேரத்தில் youtube இல் வந்து விடும். நமக்கு நேரமிருக்கும் பொழுது சாவகாசமாகப் பார்த்துக்கொள்ளலாம். அன்று ஒரு எபிசோடைத் தவறவிடுவது அப்படியல்ல. போனால் போனதுதான்.

ஒவ்வொரு எபிசோடிலும் தொடரும் என்று போடும்போது ஒரு கோபம் கலந்த ஏமாற்றம் உண்டாகும் பாருங்கள். அடுத்து என்ன நடந்தது என்று தெரிந்துகொள்ள ஒரு வாரம் காத்திருக்க வேண்டும். இன்று நமக்கு வேண்டும் என்ன சீரியலை மொத்தமாக தரவிறக்கம் செய்து ஒரே இரவில் மொத்தமாக முடித்துவிட்டு வேலையைப் பார்க்கச் சென்றுவிடுகிறோம். அன்று கிடைத்த அந்த எதிர்பார்ப்பு கலந்த சுவாரஸ்யம் இன்று எங்கும் கிடைப்பதில்லை. சீரியல் முடிந்த பிறகு end credits இன் போது வாலில் எரியும் நெருப்புடம் ஓடும் ஒரு அனிமேஷன் குதிரை அன்றைய குழந்தைகளின் favorite.



90's கிட்ஸ்களின் ஆஸ்தான சீரியலான இந்த மர்மதேசம்  மீண்டும் தயாரிப்பு நிறுவனமான கவிதாலயாவில் சொந்த youtube சேனலில் கடந்த ஜூன் 21 முதல் ஒளிபரப்பாகி வருகிறது.

தொடர்ந்து செப்டம்பர் 13 முதல் மர்மதேசத்தின் முதல் பகுதியான "ரகசியம்" தொடரும் ஒளிபரப்பாகவிருக்கிறது.

சிறுவயதில் தவற விட்ட 90's கிட்ஸ், இதனை பார்க்க வாய்ப்பு கிடைக்காத 2k கிட்ஸ் என அனைவரும் பார்த்து மகிழவும்.. சாரி.. பயப்படவும்!!!

Tuesday, June 18, 2019

அயோக்யாவும் தம்பி ராமைய்யாவும்!!!


Share/Bookmark



”நீ தெலுங்கந்தானே… உனக்கு தெலுங்கு படம் தான் புடிக்கும்” ”தெலுங்கு படம்னா தூக்கி வச்சி பேச வந்துருவியே.. அவ்வளவு தாய் மொழிப்பற்று” இப்படியான கமெண்டுகள்தான் சமீபத்துல நம்ம பதிவுக்கு வருது. அதாவது நான் ஒரு தெலுங்கன் என்பதால்தான் தெலுங்குப் படங்களை தூக்கி வைச்சிப் பேசுறேனாம். ஏண்டா டேய்.. இங்க எத்தனை பேரு ஹாலிவுட் படங்களை தூக்கி வச்சி பேசுறானுங்க.. அவனுங்கல்லாம் என்ன வெள்ளக்காரனுங்களா? உங்க லாஜிக்குல தீய வைக்க.

ஒரே மாதிரியான ரசனையுடைய  மக்களுக்கு, ஏறத்தாழ ஒரே பழக்க வழக்கங்களை உடைய மக்களுக்கு ஒரே பட்ஜெட்டில் எடுக்கப்படும் படங்களில் தமிழ்ப் படங்கள் மட்டும் ஏன் தரத்தில் மாறுபடுகின்றன என்பதுதான் என்னுடைய ஆதங்கம். அதுமட்டுமில்லாம தமிழ் சினிமாவ அடுத்த கட்டத்திற்கு எடுத்துச் செல்லும்  இயக்குனர் பேர்வழிகள் செய்த ஒரே சாதனை பல பேர தியேட்டருக்கு போகவிடாம செஞ்சது மட்டும் தான். இதச் சொன்னா நம்மள தெலுங்கன்றானுங்க. சரி நம்மள தெலுங்கன்னு சொல்றதுக்கு அடுத்த இன்னொரு பதிவு.

ஏற்கனவே நாம பார்த்து நமக்கு பிடிச்ச  படங்களோட ரீமேக்கை வேறு மொழிகளில் பார்க்குறத விட கொடுமை வேற எதுவும் இல்லை. ”96” ரீமேக்குல கன்னடா காரனுங்க புல்டோசர விட்டு ஏத்துனப்ப நமக்கு எப்புடி வலிச்சிது. அதே தான் பல படங்களுக்கு நடக்குது. பாதி நமக்கு தெரியிறதில்லை அவ்வளவு தான். பாட்ஷா படத்தோட கன்னடா ரீமேக்க சமீபத்துலதான் பாத்தேன். சத்தியமா ஜனகராஜ் பாட்ஷாவா நடிச்சா எப்படி இரூந்துருக்குமோ அந்த எஃபெக்ட்தான் இருந்துச்சி அந்தப் படத்த பாக்கும்போது. எது? அப்ப ஜனகராஜ் ரோல்ல நடிச்சவரு எப்படி இருந்தாருன்ன்னு கேக்குறீங்களா?

சரி மேட்டருக்கு வருவோம். ஜூனியர் NTR நடிச்ச டெம்பர் தான் ஆக்டிங்ல இப்பவரைக்குமே அவரோட பெஸ்ட்டுன்னு நா நம்புறேன். அந்தப் பட்த்தோட ரீமேக் ரைட்ஸ் ரொம்ப நாளுக்கு முன்னாலயே வாங்கி வச்சிக்கிட்டு அதுல சிம்புவ நடிக்க வைக்கப்போறதா பேச்சு அடிபட்டப்பல்லாம் என்னோட மூச்சு நின்னு போற மாதிரி இருந்துச்சி. ஏற்கனவே ஒஸ்திங்குற படத்த எடுத்து டபாங்க் படத்து அஸ்திய கரைச்சதெல்லாம்  கண்ணு முன்னால வந்து போகுமா இல்லையா.. கடைசியா விஷால வச்சி எடுக்குறதா சொன்னாங்க. நம்ம பேசிக்கலா ஒரு விஷால் ஃபேன்ங்குறாதால பெருசா ஒண்ணும் எஃபெக்ட் இல்ல.

அயோக்யா டீசரப் பாத்தப்போதான் தெரிஞ்சிது இது ஜெயம் ராஜாவ மிஞ்சிய ஒரு ரீமேக் பன்னிருக்காங்கன்னு. ஒரு காட்சி, ஒரு வசனம் கூட மாத்தமா அப்படியே. அப்பவே முடிவு பன்னிட்டேன்… பாக்கக் கூடாதுன்னு.
டெம்பர் படம் பத்தி எப்ப நினைச்சாலும் கண்ணு முன்னால முதல்ல வர்றது pre climax ல போலீஸ் ஸ்டேஷன்ல வர்ற ஒரு சண்டை தான். அந்த ஃபைட் ஆரம்பிக்கிற விதம், அதற்கு முன்னால விஷாலுக்கும் அவருடைய உதவியாளரா இருக்க ஒரு போலீஸுக்கும் நடக்குற வாக்குவாதம்  செம்மையா இருக்கும். போசனி கிருஷ்ண முரளின்னு ஒரு காமெடியன் அந்த ரோல பண்ணிருப்பாரு. அவரு காமெடியன்னாலும் எமோஷனலா அந்த சீன்ல பயங்கரமா பண்ணிருப்பாரு.

எனக்கு படம் எப்டி இருக்கும்ன்றத விட அந்த ரோல் தமிழ்ல யாரு பண்ணிருப்பான்றத தெரிஞ்சிக்கிறதுதலதான் ரொம்ப ஆர்வமா இருந்துச்சி. டீசர்ல அது யாருன்னு காமிக்கல. ஆனா ட்ரெயிலர்ல அது கே.எஸ்.ரவிக்குமார்னு தெரிஞ்சிது. சரி எதோ வித்யாசமா ட்ரை பன்றாங்க போலருக்குன்னு நினைச்சிருந்தேன்.

படம் பாத்த பல பேருகிட்ட படம் எப்டி இருக்குன்னு கேட்டத விட செகண்ட் ஆஃப்ல ஒரு சீன் வருமே அது எப்டி?ன்னு தான் கேட்டேன். நம்ம அந்த தெலுங்கு படத்த பாத்து எக்ஸைட் ஆன அளவுக்கு தமிழ்ல பாத்து யாரும் அவ்வளவு எக்ஸைட் ஆனதா தெரியல. கடைசியா நேத்துதான் அந்த சீனப் பாத்தேன். சர்வ நாசம்.

அது ஒரு மசாலா காட்சிதான். ஆனாலும் அவ்வளவு எமோஷான சீன எதோ கடனுக்குன்னு எடுத்து வச்சிருந்தாங்க. நா அந்த ரோல்ல ரொம்ப ஆவலா எதிர் பார்த்த்து நம்ம தம்பி ராமைய்யாவத்தான். உண்மையிலயே தம்பிராமையாவ அந்த ரோல்ல போட்டுருந்தா அந்த சீன் பிரிச்சிருப்பாரு.
சில படங்கள்ல அவர்  ஒரு மொக்கை காமெடியன் தான். ஆனா அதே ஓரு கேரக்டர் ரோல்னு வரும்போது ஏந்த ஒரு குறையும் கண்டுபிடிக்க முடியாத அளவுக்கு தரமான நடிப்ப கொடுப்பவர். தொண்டன் படத்துல 5 நிமிஷ காட்சின்னாலும் ஆளு மெரட்டிருப்பாரு.

விஷாலும் சைடு வகுடெல்லாம் எடுத்து பாக்க ரொம்பக் கண்றாவியா இருந்தாரு. ஒத்த சீன் பாத்ததுல மொத்த படம் பார்க்க இருந்த கொஞ்ச ஆர்வமும் போயிருச்சி. நம்ம மைண்டுல டெம்பரே இருக்கட்டும்னு அத்தோட அந்த ப்ராஜெக்ட ட்ராப் பன்னிட்டேன்.
டெம்பர் பட்த்துல வர்ற அந்த சீன்..




கொலைகாரன்!!!


Share/Bookmark

Monday, June 3, 2019

NGK- நொந்த கோபாலன் குமரன்!!!


Share/Bookmark

ரொம்ப நாளுக்கப்புறம் செல்வா சார் படம். ஹீரோவுல எப்டி சிம்புவோ  அதேமாதிரி டைரக்டர்ல இவுக.. பூஜை போடுவாரு.. போஸ்டர் விடுவாரு.. ஆனா படம் மட்டும் வராது. அதே மாதிரி கமல் படம்லாம் எப்டி 15 வருஷம் கழிச்சி பாத்தா தான் புரியும்னு சொல்லுவாய்ங்களோ அதே மாதிரி செல்வா சார் படம்மெல்லாம் பத்து வருசம் கழிச்சி பாத்தாதான் புரியும்னு அடிச்சி விட ஆரம்பிச்சிட்டாய்ங்க போன்வாரம்தான் புதுப்பேட்டை நல்ல படம்னு சொல்லிக்கிட்டு இருந்தாய்ங்கஇன்னும் மயக்கம் என்ன, இரண்டாம் உலகம்னு ஏகப்பட்ட படம் லிஸ்டுல வெய்ட்டிங்ல இருக்கு. அநேகமா 2030 இந்த 2030 la இந்த NGK ஒரு மிகச்சிறந்த படமாக அமைய நிறையவே வாய்ப்பிருக்கு. சரி வாங்க படம் எப்டி இருக்குன்னு பாப்போம்.

ஒரு கவுன்சிலரோ இல்ல ஒரு அரசியல்வாதியோட அள்ளக்கையோ விரல் நுனியில செய்யிற வேலைய ஒரு சாதாரண மனிதன் செய்யனும்னா எவ்வளவு நேரம் ஆகுது?  So, அரசியல்வாதியாகி ஒரு பவர்ல இருந்தா நாம நினைச்சத மக்களுக்கு செய்யலாம்னு சூர்யாவுக்கு புரிய, அவரும் ஒரு அரசியல்வாதியாக மாறி எப்டி பவருக்கு வர்றாருன்றதுதான் படத்தோட கதை. கேக்குறதுக்கு நல்லாருக்குல்ல. ஆனா சத்தியமா பாக்குறதுக்கு நல்லால..

படத்துல சூர்யா ஒரு இயற்கை விவசாயி. விவசாயம் செய்யிறதுல உள்ள நிம்மதியப் பத்தி ஒரு சீன் பேசுவாறு பாருங்க. “என்னடா வேலை பாக்குறாங்க. காலையில பஞ்ச் அடிச்சிட்டு உள்ள போட்டு சாத்திடுறாங்க. ஒரே சேர தேச்சி தேச்சி உக்காந்துக்கிட்டு மணியடிச்சா சோறப் போட்டு சாயங்காலம் தொறந்து விடுறாங்க. கேக்க ஜெயில் மாதிரியே இருக்குல்ல. ஆனா விசயம் பண்றப்ப மண்ணு வாசனை, கொழம்பு வாசனை, இயற்கை காத்துன்னு நிம்மதியா இருக்குன்னாரு. உடனே வீறு கொண்டு எழுந்து நம்மளும் வேலைய விட்டுட்டு விவசாயம் பன்னப் போயிருவோம்னு எந்திரிச்சிட்டேன். அப்புறம்தான் யோசிச்சி பாத்தேன். நமக்குதான் ஊர்ல விவசாயம் பன்றதுக்கு இடமே இல்லையே..  அப்புறம் எங்க போறது.. சரி மொதல்ல இந்த வேலையப் பாத்து ஒரு இடத்த வாங்குவோம். அப்புறம் போய் விவசாயத்த பாப்போம்னு வேலைய இப்ப கண்டினியூ பன்னலாம்னு இருக்கேன்.

எதுக்கு அண்ணனும் தம்பியும் மாத்தி மாத்தி விவசாயிகளைக் காக்க புடிச்சிட்டு இருக்காங்கன்னு தெரில. இதே மாதிரி ஒரு அபத்தமான காட்சி கடைக்குட்டி சிங்கம் படத்துலயும் வந்துச்சி. அதுக்கு நம்ம என்ன ரிப்ளை குடுத்தோம்னு கொஞ்சம் பாத்துட்டு வரலாம்.



சமீபத்துல LKG ன்னு ஒரு படம் வந்துச்சி. எத்தனை பேர் பாத்துருப்பீங்கன்னு தெரில.. பாக்காதவங்க பாருங்க. கண்டிப்பா ஒரு தடவ பாக்கலாம். அந்தப் படத்தோட கேவலமான வெர்ஷந்தான் இந்த NGK. உண்மையிலயே அந்தப் படத்தோட கதையும் இந்தப் படத்தோட கதையும் கிட்டத்தட்ட ஒண்ணுதான். ஆனா அந்தக் கதையிலயும் திரைக்கதையிலயும் இருந்த தெளிவு சத்தியமா இந்தப் படத்துல கொஞ்சம் கூட இல்ல.

இந்த NGK படத்தோட ட்ரெயிலர் வந்தப்போ இத அடுத்த புதுப்பேட்டைங்குற அளவுக்கு பில்ட் அப் குடுத்துக்கிட்டு இருந்தோம். ஆனா படம் பாத்தப்புறம் புதுப்பேட்டைல ஒரு சீன் குடுத்த தாக்கத்த கூட இந்த முழுப்படமும் தரலன்னு தெரியிது.

"என் பேரு நந்த கோபலன் குமரன். என்ன எல்லாரும் NGK ன்னு கூப்டுவாங்க…"ன்றாரு. நானும் படம் முழுக்க தேடிட்டேன்.. யாராச்சும் NGK ன்னு கூப்டுவாங்களான்னு.. ஒரு பய கூப்டல.. நமக்கு நாமே மாதிரி இவரே சொல்லிக்கிட்டு திரியிறாப்ள.

சாய் பல்லவி, ரகுல் ப்ரீட் சிங்னு ரெண்டு ஹீரோயின். போலீஸ்ல மோப்ப நாய்க்கு எதுவும் உடம்பு சரியில்லன்னா சாய் பல்லவிய அழைச்சிட்டு போகலாம். நல்லா மோப்பம் புடிக்கிது. ரகுல் ப்ரீட் சிங் LKG ல ப்ரியா ஆனந்த் பன்ன அதே ரோல். பல ஸ்டேட்டுல ஆட்சிய கவுத்து விட்டவங்க. பல ஸ்டேட்டுல ஆட்சிய புடிச்சி குடுத்தவங்க. என்னடா எதோ பைப்புல தண்ணி புடிக்கிற மாதிரி சொல்றீங்க.

சூர்யாவோட நோக்கம் என்ன அவரு எத நோக்கி போறாருன்றதெல்லாம் யாருக்குமே தெரியாத புதிர். தடி மாடு மாதிரி உடம்ப வச்சிக்கிட்டு இளவரசுகிட்ட போய் கக்கூஸ் கழுவி, கூல கும்புடு போட்டு வேலை பாக்குற மாதிரியெல்லாம் காட்சி எடுத்துருக்கது பாக்கவே ரொம்ப அபத்தமா இருக்கு.

படத்துல நிறைய முன்ணனி நட்சத்திரங்கள் நடிச்சிருக்காங்க. ஆனா அத்தனையும் சும்மா டம்மியா வந்துட்டுப்போறாங்க. வேல ராமமூர்த்தியெல்லாம் நல்ல screen presence உள்ளவரு. அவருக்கு படத்துல அள்ளக்கைக்கு ஒரு கடைசி அள்ளக்கை இருந்தா என்ன முக்கியத்துவம் இருக்குமோ அதுகூட இல்லை.  தலைவாசல் விஜய்க்கும் அதே கதி தான்.
வழக்கமா எல்லா படத்துலயும் comeback குடுக்குற யுவனோட இசையில ஒரு பாட்டு மட்டும் நல்லாருக்கு. மத்தபடி ரொம்ப ஆவரேஜ் தான்.

முதல் பாதிகூட எதோ பரவால்லாம ஓடுது. ரெண்டாவது பாதியெல்லாம் ச்சை… எந்த வகையில அதெல்லாம் சேக்குறதுன்னே தெரியல. படத்துல சூர்யா மட்டும் பாக்க ஆளு செமையா இருக்காரு. மத்தபடி உருப்படியா எதும் இல்ல.

மொத்தத்துல மேல சொன்ன மாதிரி 2030 வாக்குல இந்த NGK ஒரு நல்ல படமாக வர்றதுக்கு வாய்ப்பிருக்கே தவற இப்பதைக்கு இத பாக்குறது வேஸ்ட்.

Tuesday, May 28, 2019

இதுதான் உங்க பெரியார் மண்ணா? | பெரியார் மண் For Sale !!!


Share/Bookmark

Thursday, May 2, 2019

AVENGERS - END GAME!!!


Share/Bookmark

இந்தியா திரைப்படங்களுக்கான ஒரு மிகப்பெரிய மார்க்கெட். அவற்றை ஆங்கிலப்படங்கள் தற்பொழுது மிகப்பெரிய அளவில் பயன்படுத்திக்கொள்ள ஆரம்பித்திருக்கிறது. ரொம்பவெல்லாம் இல்லை…  இந்த அவெஞ்சர்ஸ் தொடரின் ஒவ்வொரு பாகமும் எப்படி இந்தியாவில் வரவேற்பைப் பெற்றது என்று கவனித்தாலே இந்தியாவில் அவர்களில் அசுர வளர்ச்சி தெரியும். அவெஞ்சர்ஸ் முதல் பாகம் வழக்கமாக டப்பிங் செய்யப்படும் Fantastic 4, X-men வகையிலான அளவில் தான் வரவேற்பைப் பெற்றது. அடுத்து age of ultron இன்னும் அடுத்த படியில் இருந்தது. Black Panther, Thor-Ragnarok  படங்களைத் தொடர்ந்து வந்த அவெஞ்சர்ஸ் infinity war அதற்கு முன்னர் வந்த எந்த படங்களிலும் இல்லாத அளவிற்கு வரவேற்பைப் பெற்றது. வசூலில் மட்டுமல்லாமல்

நமது மொழியின் சூப்பர் ஹீரோவை எப்படி வரவேற்போமோ அதே போல ஒவ்வொரு சூப்பர் ஹீரோவின் அறிமுகத்திற்கும் அப்படி ஒரு ஆரவாரம் திரையரங்குகளில். தற்பொழுது வெளியான end game அனைத்தையும் தூக்கி சாப்பிட்டு விட்டது. முதல் முறையாக ஒரு வேற்று மொழி திரைப்படத்திற்கு நள்ளிரவுக் காட்சி முதல் 24 மணி நேரமும் தொடர்ந்து காட்சிகள். அத்தனையும் அரங்கு நிறைந்த காட்சிகள்.  இத்தனை வருட தமிழ் சினிமா வரலாற்றில் ரஜினி, விஜய், அஜித் இவர்களைத் தவிற இந்த நள்ளிரவுக் காட்சிகள், 24 மணி நேரமும் காட்சிகள் என எந்த நடிகரும் பார்த்த்தில்லை.

மிக அரிதாக நடக்கக் கூடிய சம்பவங்களில் ஒண்று இந்த அவெஞ்சர்ஸ் எண்ட் கேம். இத்தனை சூப்பர் ஹீரோக்களை அறிமுகப்படுத்தி, அவர்களை ஒரே கதைக்குள் கொண்டு வந்து, அவர்களை ஒரே படத்தில் நடிக்க வைப்பது என்பது சாதாரண விஷயமில்லை. இன்னும் KGF ராக்கி ஸ்டைலில் சொல்லப்போனால் ”எதோ நாலு சூப்பர் ஹீரோ நடிச்ச படம் இல்லடா.. இந்தப் படத்துல நடிச்ச அத்தனை பேருமே சூப்பர் ஹீரோதாண்டா”. இப்படி இத்தனை சூப்பர் ஹீரோக்களை மறுபடி இன்னும் படத்தில் கொண்டு வருவதற்கு பல வருடங்கள் ஆகலாம். அப்படி ஒரு சம்பவம் நடக்காமல் கூட போகலாம். மார்வெல்லுக்கே இப்படி ஒரு சம்பவத்தை செய்ய கிட்டத்தட்ட பன்னிரெண்டு வருடங்கள் மற்றும் 22 படங்கள் தேவைப்பட்டிருக்கிறது.  சரி இந்த Avengers –End game  எப்படி இருக்கிறது என்று பார்க்கலாம்.

6 மந்திரக் கற்களையும் எடுத்து, பூமியின் பாதி மக்கள் தொகையை தானோஸ் அழிப்பதோடு முடிந்தது  போன பாகம். ஒரு சில சூப்பர் ஹீரோக்கள் மக்களோடு மக்களாக அழிந்து போய்விட மீதமிருப்பவர்கள் எப்படி தானோஸுடன் மோதி உலகத்தை  பழையபடி மாற்றுகிறார்கள் என்பது தான் end game.

இதற்கு முந்தைய இன்ஃபினிட்டி வார் பகுதியில், ரெண்டே முக்கால் மணி நேர படம் என்றால் இரண்டரை மணி நேரம் சண்டை மட்டும் தான். முந்தைய பாகங்கள் பார்த்தாலும் பார்க்காவிட்டாலும் திரைப்படத்தைப் பார்த்துவிட்டு வந்துவிடலாம். ஆனால் இந்தப் பகுதி அப்படி அல்ல. மூன்று மணி நேர திரைப்படத்தில் கடைசி அரை மணி நேரம் தவிர்த்து மற்றவை அனைத்தும் வசனங்களுடன் கூடிய காட்சிகள் தான்.

அவெஞ்சர்ஸில் நிறைய சூப்ப்ர ஹீரோக்கள் வந்து சண்டையிட்டாலும், கதையின் பின்னணி Captain America மற்றும் Thor இரண்டு படங்களைச் சார்ந்து தான் நிகழும். அதுவும் இந்த End game இல் thor மற்றும் Captain America வின் முந்தைய பகுதிகளோட தொடர்புடைய காட்சிகள் நிறைய இருப்பதால் அந்தப் படங்கள் பார்க்காமல் இந்த End game பார்ப்பவர்களுக்கு கொஞ்சம் சலிப்பும், எங்கெங்கு காட்சிகள் நடைபெறுகின்றன என்பதில் நிறைய குழப்பமும் இருக்கலாம்.

முதல் இரண்டு மணி நேர திரைப்படம் சொல்லப்போனால் பெரிய அளவில் எந்த ஈர்ப்பும் இல்லாமல், எந்த ஒரு பெரிய ஸ்டண்டும் இல்லாமல் ஏனோ தானோவென்று செல்கிறது. ஏற்கனவே பல முறை பார்த்து சலித்த டைம் ட்ராவல் கான்செப்டிலும் கொஞ்ச நேரம் படம் பயணிப்பது பெரிய அளவில் எடுபடவில்லை. தூக்கம் லேசாக கண்ணைக் கட்டும்போது சூடு பிடிக்கிறது படம். கடைசி அரை மணி நேரம். தாறு மாறு…

அத்தனை சூப்பர் ஹீரோக்களும் ஒன்றாக வந்து நிற்கும் அந்தக் காட்சியிலும், Thor ன் பழைய சுத்தியல் கேப்டன் கைக்கு செல்லும் அந்தக் காட்சியிலும் புல்லரிக்கிறது.

Hulk இன் கேரக்டர் infinity war இலும் சரி இந்த end game மிலும் சரி சற்று டொம்மையாக்கப் பட்டிருக்கிறது. முதல் இரண்டு பகுதிகளில் hulk தான் பட்டையைக் கிளப்புவார். அவர் எப்பொழுது மாறுவார் என்பதைப் பார்ப்பதே ஒரு சுவாரஸ்யமானதாக இருக்கும். ஆனால் கடந்த இரண்டு பகுதிகளிலும் hulk கேரக்டர் பெரிதாக எடுபடவில்லை.

தானோஸ் மிகப்பெரிய வில்லனாக சித்தரிக்கப்பட்டாலும் அவர் உருவ அமைப்பு பார்க்க பரிதாபமாக இருக்கிறது. அதுவும் தோட்டத்தில் பழம் பறித்துக் கொண்டிருப்பவரை இவர்கள் மொத்தமாக சென்று சுற்றி வளைத்து கொல்லும் காட்சியில் தானோஸ் மேல் பரிதாபம் தான் வந்தது. கடைசி காட்சியில் பூமியில் மொத்தமாகச் சேர்ந்து அவரை அடிக்கும் போதும் "நாலு பேரா சேந்து வந்து அடிக்கிறவன்லாம் ரவுடி இல்லடா..ஒத்தையா நின்னு அடிவாங்குறான் பாரு அவன்ந்தான் ரவுடி" என்பது போல முகத்தைப் பார்க்க பாவமாக இருந்தது.

ஸ்பைடர் மேன், ஆண்ட் மேன், கேப்டன் மார்வெல் போன்ற தேவையில்லாத ஆணிகள் அவ்வப்போது வந்து செல்கின்றன. படத்தில் இருக்கும் அத்தனை பேருமே முக்கியமான கதாப்பாத்திரங்கள் என்பதால் அனைவருமே கொஞ்ச கொஞ்ச நேர காட்சிகள்.

இந்த மார்வெல் சீரிஸின் 22 படங்களில்  அவெஞ்சர்ஸ் தவிர்த்து எனக்கு மிகவும் பிடித்த படங்கள் Thor-Ragnarok, Captain America- Civil war, Doctor strange, Black Panther. நேரமிருப்பவர்கள் பார்க்கலாம். வரிசையாகப் பார்ப்பது நலம். தனித் தனியாகப் பார்த்தாலும் ஒருசில லிங்குகள் புரியாதே தவிற சுவாரஸ்யமாகவே இருக்கும்.

மொத்ததில் ஒரு மிகப்பெரிய சினிமாத் தொடருக்கான நல்லதொரு முடிவுப் பகுதி. கொஞ்சம் பொறுமையும் அவசியம். 

LinkWithin

Related Posts Plugin for WordPress, Blogger...