கொடி – நல்லாவே பறக்குது!!!

கொடி – நல்லாவே பறக்குது!!!

தனுஷோட மாரி படம் ரிலீஸ் ஆகியிருந்த சமயம் “செஞ்சிருவேன்” வசனம் ரொம்ப ஃபேமஸா இருந்துச்சி. அப்ப படம் பாத்த சில பேரு ”படத்துல நம்மள வச்சித்தான் செஞ்சிட்டாங்க” ன்னு ரைமிங்கா ஆரம்பிச்சி வச்சானுங்க. அப்பலருந்து இந்த “செஞ்சிட்டானுங்க” குரூப் தொல்லை தாங்க முடியல. எந்த படத்துக்கு போனாலும் “செஞ்சிட்டாங்க” “செஞ்சிட்டாங்க”ன்னு  ஸ்டேட்டஸ் போட்டுக்கிட்டு இருக்காய்ங்க. நாயக் கூப்டு “உன்ன என்ன நாயே செஞ்சாங்க கொஞ்சம் சொல்லு” ந்ன்னு கேட்டா சொல்லத் தெரியாது. ஏன் படம் நல்லா இல்லைன்னு கேட்டாலும் தெரியாது. இப்ப வரைக்குமே மாரிய நல்லால்லன்னு சொல்றவனுங்கள்ள பாதி பேருக்கு ஏன் நல்லால்லன்னு சொல்றானுங்கன்னு அவய்ங்களுக்கே தெரியாது. ”பேப்பர் ரோஸ்ட் சாப்டா லிவருக்கு நல்லது” ”யாரு சொன்ன்னது?” ”எல்லாரும் சொல்றாங்க நானும் சொல்றேன்.” கதை தான்.

அதுவும் இப்ப திரியிறது எல்லாமே அதிகப்பிரசங்கிகளாத்தான் திரியிதுங்க. எல்லாம் ஒலக சினிமா குரூப்பு. இப்பதைக்கு இவனுங்க யோசிக்காம நல்லாருக்குன்னு சொல்றது “காக்கா முட்டை” மணிகண்டன் படங்களத்தான். அந்தாளும் இன்னொரு நாலஞ்சி படம் ஹிட்டாகி பெரியாளாயிட்டா அப்புறம் படம் வர்றதுக்கு முன்னாலயே அவர் படங்களையும் ஃப்ளாப் ஆக்கி விட்டுருவானுங்க.

இன்னொரு குரூப்பு “படம் நல்லாருக்கு”ன்னு ஸ்டேட்டஸ் போட்டோம்னா “உண்மையாவா சொல்றீங்க?” “அப்டியெல்லாம் இருக்காதே” ம்பானுங்க. நாயே படம் பாத்துட்டு பேசிக்கிட்டு இருக்கேன். நீ குத்து மதிப்பா கொஸ்டீன் கேட்டுக்கிருக்க. இதெல்லாம் ஏன் சொல்றேன்னா இந்தப் படத்துக்கும் இந்த ‘செஞ்சிட்டானுங்க” குரூப் வேலைய காமிப்பானுங்க. அதுங்கள்ட “மொதல்ல நீ படம் பாத்தியா”ன்னு கேக்கனும்.

SPOILER ALERT

இதுவரை நமது பதிவுகள்ல Spoiler Alert கள் போட்டதில்லை. ஏன்னா படத்தின் கதை சுவாரஸ்மாக இருந்தாலோ, இல்லை படத்தோட ட்விஸ்ட், முக்கியமான காட்சிகளப் பத்தி பதிவுகள்ல நா போடுறது இல்லை (அப்டின்னு நானே நினைச்சிட்டு இருக்கேன்.) ஆனா போன தடவ ஒருத்தர் ஃபீல் பன்னிட்டாரு. அதற்காக. சரி கொடியப் பறக்க விடுவோம்.

கொடி படத்தின் ட்ரெயிலரப் பாத்துட்டு, பாடல்களைக் ஒரு தடவப் கேட்டாலே, எப்பவாச்சும் சினிமா பாக்குற ஆளால கூட இந்தப் படத்தோட கதையை 90% கணித்து விட முடியும். தமிழ்சினிமாவோட பாரம்பரிய Identical twins கதைய அரசியல் களத்துல சொல்லிருக்காங்க.

மீசை வச்சா சந்திரன், மீசைய எடுத்தா இந்திரன் மாதிரி மீசை தாடி வச்சி மொரட்டுத் தனமா இருந்தா அண்ணன் கொடி. நீட்டா ஷேவ் பன்னிக்கிட்டு ஃபுல் ஃபார்மல்ஸ்ல சாஃப்ட்டா இருந்தா தம்பி அன்பு. இந்த ரெண்டு க்ளீஷே கேரக்டர்களை வச்சி என்ன மாதிரி வேணாலும் படம் எடுக்கலாம். பெரும்பாலும் நம்ம தமிழ் சினிமாவுல கையாளப்பட்டிருப்பது ஆள்மாராட்டக் கதை தான்.

எம்ஜியார், ரஜினி, கமல்னு உட்பட இந்த ஆள்மாராட்டக் கதைகளில் பெரும்பாலானவங்க நடிச்சிருக்காங்க. கோழையாக இருந்தவர் இடத்தில் அதிரடி ஹீரோ உள்ள போய் முதல்ல ஆட்டம் போட்ட வில்லன்களையெல்லாம் வெளுத்து வாங்குவார். அதப் பாக்க நமக்கும் ஹேப்பியா இருக்கும்.

இதான் நம்ம பாரம்பரியம். பாரம்பரியத்தையும் விட்டுடாம, முழுசா அதே பழைய வடையையும் சுடாம, ரொம்ப பெரிய மாற்றங்களும் செய்யாம பட்டும் படாம, இந்த ட்வின்ஸ் மேட்டர சிறப்பா டீல் பன்னி ரசிக்கும்படியான ஒரு படத்தக் குடுத்துருக்காங்க.

ரெண்டு தனுஷூக்குமே தனித்தனி காதல் கதை. கொஞ்சம் காமெடி. தனுஷ் அரசியல்ல இருக்கதுக்கு ஒரு ஸ்ட்ராங்கான முன்கதைன்னு எல்லாமே நல்லா பன்னிருக்காங்க. தம்பியாக வர்ற தனுஷ் அப்படியே “வேலையில்லா பட்டதாரியில “ அவருக்கு தம்பியா நடிச்சவர மாதிரியே பன்னிருக்காரு. நேர் மாறா கொடி கேரக்டர்ல செம கெத்து. பிரிச்சிருக்காரு.

தீப்பொறி ருத்ராவாக திரிசாக்கா. பதவிக்காக எதையும் செய்யத் துணியும் பெண் அரசியல்வாதியா நடிச்சிருக்காங்க. அவங்க கேரக்டர ஆரம்பத்துலருந்தே கொஞ்சம் கொஞ்சமா வெளிச்சம் போட்டு காட்டுறதாலயே என்னவோ “கொடி” தனுஷ்- ருத்ரா காதல் காட்சிகள்ல காதலை விட ஒரு cunningness  தான் வெளிப்படையா தெரியிது.

ப்ரேமம் அனுபமா கொஞ்ச சீன் தான் வர்றாங்கன்னாலும் அழகு. S.A.சந்திரசேகர், ராஜ்கபூர், template அம்மா சரண்யா, காளி வெங்கட்ன்னு நட்சத்திர பட்டாளங்கள் ஏராளம். எல்லாம் அவங்கவங்க வேலைய கரெக்ட்டா செஞ்சிருக்காங்க. MLA கருணாஸ்  கேரக்டரும், நடிப்பும் அருமை.

தனுஷோட ஸ்க்ரீன் ப்ரசன்ஸ், ஸ்டைல், நடிப்பு அனைத்துமே சிறப்பு. ஸ்டண்ட்டும் நல்லா பன்னிருக்காங்க. “கொடி பறக்குதா’ பாட்டு ஆரம்பிக்கிறப்போ தியேட்டர்ல விசில சத்தம் பொளந்துருச்சி. நா மறுக்கா மறுக்கா சொல்றேன்… அதான். அதே தான். அடுத்து தனுஷ்தான். Mark my words.

பாடல்களும் சிறப்பு. சித்ரா பாடுன பாட்ட ஆல்பத்தோட ரிலீஸ் பன்னாம இருந்துருந்தா ட்விஸ்ட்ட இன்னும் கொஞ்சம் ட்விஸ்ட் மாதிரி ஃபீல் பன்னிருக்கலாம். இயக்குனர் துரை செந்தில்குமார் எதிர் நீச்சலுக்கு பிறகு, இதுல அதவிட நல்ல இம்ப்ரூவ்மெண்ட். கொஞ்சம் கூட போர் அடிக்காத திரைக்கதை அமைப்பு.

பல வருஷங்களுக்கு முன்னால ரஜினியும் பாரதிராஜாவும் ஏத்துன கொடி அவ்வளவு சிறப்பா பறக்கல. ஆன இப்ப தனுஷும் துரை.செந்தில்குமாரும் ஏத்திருக்க கொடி ரொம்ப நல்லாவே பறக்குது. வேலையில்லா பட்டதாரிக்குப் பிறகு மிகப்பெரிய வெற்றிக்காக காத்திருக்கும் தனுஷுக்கான கரெக்ட்டான படம். நல்ல எண்டர்டெய்னர். குடும்பத்தோட பாக்கலாம். 

ரெமோ – ஜாவா சுந்தரேசன்!!!!

ரெமோ – ஜாவா சுந்தரேசன்!!!!

முதல் முதலா ”3” படத்துல அள்ளக்கைய்யா அறிமுகமான சிவா, அடுத்தடுத்து நம்ம ஜாவா சுந்தரேசன் மாதிரி முதல்ல பைக் , அடுத்து கார்ன்னு படிப்படியா முன்னேறி இப்ப ஹெலிகாப்டர் லெவல்ல வந்து நிக்கிறாரு.. அதுவும் அதிகாலை 5 மணி ஷோ போடுற அளவுக்கு. அதுவும் இந்த வளர்ச்சி எப்புடின்னா, ”தமிழ்ப் படம்” படத்துல சிவா ”அழகு”கிட்ட பொண்ணு கேக்க வருவாரு. அப்ப ”உங்கிட்ட என்ன இருக்கு”ன்னு அசிங்கப்படுத்தி சிவாவ வெளில அனுப்பிட்டு ஒரு காஃபி கொண்டு வரச் சொல்லுவாரு. வேலைக்காரம்ம்மா காஃபி கொண்டு வர்றதுக்குள்ள , சிவா ஏர்போர்ட், சிவா ரயில்வே ஸ்டேஷன்னு பெரிய லெவல்ல டெவலப்பாகி கார்ல வந்து இறங்குவாரு. அந்த மாதிரிதான் நம்மளயும் ஆச்சர்ய பட வைக்கிறாரு சிவா. நாலு வருஷத்துல இது மிகப்பெரிய வளர்ச்சி தான்.

நடிச்சது ஐஞ்சாரு படங்கள் அதுல ஹிட்டானது ரெண்டு மூணு படங்கள். இதுலயே சிவகார்த்திகேயன் படங்களுக்கு பல கோடிரூபாய் மார்க்கெட். இந்த ரெமோ கோட 80 கோடி வரை வியாபாரம் ஆகியிருப்பதாக எதோ செய்தில பார்த்தேன். ”என்பது கோடி… நீ பாத்த”ன்னு சூரி  மாதிரி நீங்க கேக்குற கேள்விகளுக்கு கம்பெனி பொறுப்பாகாது. சரி இந்த ரெமோ எப்டி இருக்குன்னு பாப்போம்.

நிச்சதார்த்தம் நடந்த ஒரு பொண்ணோட மனச மாத்தி கரெக்ட் பன்னி கல்யாணம் பன்ற கதைய 100வது முறையா எடுத்துருக்காங்க. இவய்ங்க நிச்சயதார்த்தம் நடந்த புள்ளைங்கள கரெக்ட் பன்ற மாதிரி படங்களா எடுத்து எடுத்து நம்மாளுக அதே ஃபார்முலாவ கல்யாணம் ஆன புள்ளைங்களுக்கு அப்ளை பன்னி, அதுங்கள பிரிச்சி கூட்டிட்டு ஓடிருறாய்ங்க.

சின்ன வயசுலருந்து நடிகனாகனும்ங்குற ஆசையோட இருக்க சிவா, எந்த வாய்ப்பும் கிடைக்காம சுத்திக்கிட்டு இருக்காப்ள. ஒரு தடவ K.S.ரவிக்குமார் படத்தோட audition க்கு போய், லவ் ஃபீலிங் வராம ரிஜெக்ட் செய்யப்படுறாரு. அப்ப ரவிக்குமார் லவ்வுன்னா என்னன்னு சிவாவுக்கு விளக்க, சிவா வெளில வந்த அடுத்த நிமிஷம், ரோட்டுல பாக்குற ஒரு பொண்ணை பாத்து கப்புன்னு விழுந்துடுறாரு. அதுவரைக்கும் பொண்ணுங்கன்னாலே பயம், பொண்ணுங்கன்னாலே பேசத்தெரியாதுன்னு சொல்லிக்கிட்டு இருக்க சிவா, தமிழ் சினிமா ஆரம்பிச்ச காலத்துலருந்து ஹீரோயின் இண்ட்ரோவுக்காக வச்சிருக்க ஒரு பழைய மொக்கை லவ் சிட்சுவேஷன கே.எஸ்.ரவிக்குமார் சொன்னதும் லவ்வு வந்துருது.

ஆனா பின்னாலயே அதுக்கு நிச்சயதார்த்தம் ஆனதும் தெரியிது. அதன் பிறகு மனசு உடைஞ்சி போற சிவா, சந்தர்ப்ப சூழ்நிலையில நர்ஸ் வேஷம் போட்டு, தனுஷ் மாதிரி மாறி, எப்படி கீர்த்தி சுரேஷை எங்கேஜ்மெண்ட் ஆன பையன்கிட்டருந்து பிரிச்சி லவ் பன்றாருங்குறதுதான் கதை.

படத்தில் எக்கச்சக்க க்ளீஷே காட்சிகள். கிட்டத்தட்ட இதுல வர்ற எல்லா காட்சிகளும் ஏற்கனவே பார்த்த காட்சிகள்தான். வசனங்களும் அப்டித்தான். SMS ல வந்த ஜோக், ஏற்கனவே படங்கள்ல வந்த ஜோக்னு கலக்கப்போவது யாருல கண்டெஸ்டண்ட்டா வந்தத இன்னும் மறக்காம அதயே பேசிக்கிட்டு இருக்காரு.

ஆரம்பத்துல கொஞ்சம் மொக்கை போடுற மாதிரி இருந்தாலும், சிவா நர்ஸ் கெட்டப்க்கு மாறுற சீன்லருந்து படம் பட்டைய கெளப்புது. படத்தோட ஆரம்பத்துலருந்து கடைசி வரைக்கும் ஒரே ஆளா நின்னு பர்ஃபார்மென்ஸ்ல பிரிச்சி எடுக்குறாரு சிவா. செம ஸ்க்ரீன் ப்ரசன்ஸ். பாடி லாங்குவேஜ்லயும், ஒன் லைன் பஞ்ச்லயும் கலக்கிருக்காரு. என்ன ஒண்ணு சில சமயம் அவரு சீரியசா அழுதுகிட்டு வசனம் பேசுறப்பயும், அது காமெடியா சீரியஸான்னு தெரியாம ரெண்டு பேரு தியேட்டர்ல சிரிச்சிக்கிட்டு இருக்காய்ங்க.

சிவா கொஞ்சம் போரடிக்கிற மாதிரி இருந்தா அத சரி கட்ட பன்னி மூஞ்சி வாயன், மொட்டை ராஜேந்திரன் மற்றும் சதீஷ் குரூப்பு வந்து காம்பன்சேட் பன்னிருது. மொட்டை ராஜேந்திரனும், பன்னி மூஞ்சி வாயனும் செம. சதீஷ்க்கு ஒண்ணு ரெண்டு காமெடி கவுண்டர் நல்லா வந்துருக்கு.

கீர்த்தி சுரேஷ தொடரில பாத்து ஏற்பட்ட காயமே இன்னும் ஆறாம இருக்க, சூட்டோட சூடா அடுத்து இன்னொன்னு. தொடரிக்கு இதுல கொஞ்சம் பரவால்ல. சிவகார்த்திகேயன் லேடீஸ் குரல்ல பேசிக்கிட்டு இருக்காரு. கீர்த்தி சுரேஷ் ஜெண்ட்ஸ் வாய்ஸ்ல பேசிக்கிட்டு இருக்கு. டைரக்டர் பர்ஃபார்மன்ஸ் பன்ற வாய்ப்ப ரெண்டு பேருக்கும் பகிர்ந்து குடுத்துருக்காரு போல

சிவகார்த்திகேயன் லேடி கெட்டப்புல செமையா இருக்காரு. லேடி கெட்டப்புல இருக்கும்போது கீர்த்தி சுரேஷ் பக்கத்துல நின்னா, ஹீரோயின் ஃப்ரண்டோட ஃப்ரண்டு மாதிரி ரொம்ப சுமாரா தெரியிது. வேற யாரயாச்சும் ஹீரோயினா போட்டுருக்கலாம்ங்குறது என்னோட தாழ்மையான கருத்து.

அர்னால்ட் அனிரூத் இசையில் பாட்டெல்லாம் ஓக்கே.. வழக்கம்போல கொஞ்சம் ஓவர் இறைச்சலும் கூட. சந்தோஷ் நாராயணன் பாடுன டாவுய்யா நோவுய்யாதான் என்னோட ஃபேவோரெட். எல்லா பாட்டையும் நல்லா செலவு பன்னி ரிச்சா எடுத்துருக்காங்க. சிவகார்த்திகேயன் டான்ஸும் சூப்பரா பன்னிருக்காரு.

ஹாஸ்பிட்டல்ல வர்ற ஒரு ஃபைட் அப்படியே அஞ்சாதே படத்துல வர்ற மாதிரி. பல காட்சி அமைப்புகளும் கேரக்டர்களும் அவ்வை சண்முகியின் ஜெராக்ஸ். ஹாஸ்பிட்டல் டீனா வர்ற ப்ரதாப் போத்தன, அவ்வை சண்முகி ஜெமினி கேரக்டர்ல எதிர்பாத்தேன். ஆனா ப்ரதாப் போத்தன ரொம்ப யூஸ் பன்னல. ஒருவேள மொத்தமா சுட்டா ரொம்ப கழுவி ஊத்திருவாய்ங்களோன்னு  விட்டாய்ங்க போல.

லேடீஸ் கெட்டப்புக்காக அவ்வை சண்முகி. ஹாஸ்பிட்டல்ல கதை கொஞ்ச நேரம் நகர்றதால கொஞ்சம் வசூல் ராஜாவும். உடம்பு சரியில்லாத ஒரு சின்னக் குழந்தை. யார் சொன்னாலும் கேக்காதது நம்ம சிவா சொன்ன மட்டும் கேக்கும். கட்டிப்புடி வைத்தியம் மாதிரி மூக்குல மூக்கத் தேய்க்கிறது. விடுங்க. விட்டா சொல்லிக்கிட்டே போவேன். இரட்டையர்களாகப் பிறந்துவிட்டால் திரைக்கதையில் வேறு என்னதான் மாற்றம் ஷெய்ய முடியும்.

நாகராஜ சோழன் கொஞ்ச கொஞ்சமா சீட்டுல உக்காருற மாதிரி, சிவகார்த்திகேயனுக்கு ஸ்பெஷல் டைட்டில் கார்டெல்லாம் போட ஆரம்பிச்சிட்டாய்ங்க. SK ன்னு முதல்ல வந்து அடுத்து அதுலருந்து Sivakarthikeyan ன்னு வருது. அடுத்த படத்துல பேருக்கு முன்னால ஃபயர் ஸ்டார், பர்னிங் ஸ்டார்னு எதயாச்சும் சேக்காம விடமாட்டாய்ங்க. SK ங்குறதப் பாத்ததும் “உனக்கு SK ஜாஸ்திடா”ன்னு சொல்ற விவேக் வசனம் ஞாபகம் வந்தா கம்பெனி பொறுப்பல்ல.

இயக்குனர் பாக்யராஜ் கண்ணன் பழைய கதைய எடுத்தாலும் கொஞ்சங்கூட போர் அடிக்காத மாதிரி திரைக்கதை, வசனம் எழுதிருக்காரு. குறிப்பா நிறைய ஒன்லைன் கவுண்டர்கள் நல்லாருக்கு. ஒரு சில காட்சிகள் கொஞ்சம் அபத்தம். சிவா கீர்த்தி சுரேஷூக்கு ப்ரப்போஸ் பன்ற காட்சி கொஞ்சம் ஓவர் டோஸ். அப்றம் லவ்வுன்னா என்னங்குற க்ளாரிட்டி வந்த உடனே, அடுத்து பாக்குற very first person கிட்டயே லவ்வுல விழுந்துடுறாங்க ரெண்டு பேரும். என்னமோ போங்க. PC ஸ்ரீராம் ஒளிப்பதிவு படத்துக்கு இன்னொரு ப்ளஸ்.

மொத்தத்துல ஆணழகன், அவ்வை சண்முகி வரிசையில இன்னொரு தரமான எண்டர்டெய்னர் இந்த ரெமோ. (யாருப்பா அது கந்தசாமிய லிஸ்டுல விட்டுட்டீங்கன்னு சொல்றது) குழந்தைகள், அப்பா, அம்மான்னு மொத்த குடும்பத்தோட எதாவது படம் பாக்கனும்னு ப்ளான் வச்சிருந்தீங்கன்னா ரெமோ அதுக்கு சூப்பர் சாய்ஸ். குறிப்பா குழந்தைகளுக்கும், பெண்களுக்கும் படம் ரொம்பப் பிடிக்கும்னு அனுமானிக்கிறேன். மகிழ்ச்சி.